Учора мы танчылі тое, што нашы прабабулі і прадзядулі танчылі ў хатах на так званых вячорках. Беларускія танцы не гэтакія відовішчныя, як, напрыклад, украінскія ці польскія, але ў іх ёсць непаўторны каларыт, яны – нашы. Магчыма, гэта прываблівала мінакоў, якія з задавальненнем далучаліся да нас. Па словах Марыны Храмцовай, асабліва моцна танцы падабаюцца дзецям, якія кідаюць самакаты, аддаюць бацькам мабілкі і прытопваюць, падскокваюць разам з дарослымі.
Праекту «Беларускія народныя танцы» ужо не адзін год. Праз яго прайшлі сотні магілёўцаў, неабыякавых да спадчыны свайго народа. Марына Храмцова адзначыла тое, што ў іх рэпертуары ёсць і ірландскія, і французскія, і польскія танцы. «Мы робім усё, каб адчуваць культурнае сэрцабіццё нашых суседзяў, але, канешне, асноўная наша задача – папулярызацыя беларускай культуры», – кажа Марына.
У якасці анонсу!
У гэту суботу ў парку Падміколле запланаваны беларускія танцы ў народных строях і з удзелам вядомых беларускіх музыкаў. Пачатак а 18-й. Запрашаюцца ўсе жадаючыя.
