«Вялікдзень – гэта духоўнае свята, – падкрэслівае айцец Віталій. – Зразумела, патрэбна духоўная падрыхтоўка. Сэрца павінна быць чыстым. Калі вы вернік, першае, што трэба зрабіць, гэта прыйсці на споведзь, ачысціцца ад грахоў, пасвятліць душу. Важны таксама ўдзел у літургіі. Вялікдзень распачынаецца з чацвярга. Вельмі важны ўдзел у літургіі Вялікага чацвярга, Вялікай пятніцы, Вялікай суботы. У Суботу, увечар, самая важная літургія ўсяго года. Вернікі абавязкова павінны прысутнічаць на ёй, не кажучы ўжо пра Нядзелю. Імша – гэта загартоўка душы. Не варта пра гэта забывацца».
– Што рабіць, калі чалавек не мае магчымасці дайсці да касцела? З той прычыны, што ў яго мясцовасці няма храма ці, магчыма, стан здароўя не дазваляе?
– Калі няма рэальнай магчымасці патрапіць у касцел, то магчыма прыняць удзел у літургіі праз тэлебачанне або праз інтэрнэт. Але гэта надзвычайны выпадак! Мяркую, сёння магчыма знайсці храм, можа, у суседнім горадзе ці мястэчку, і праехаць да яго. Было б жаданне…
– Напярэдадні Вялікдня трэба пасціцца. Што рабіць хворым людзям або цяжарным жанчынам? Мо ёсць пэўнае паслабленнне для гэтакіх людзей?
– У католікаў пост крыху інакш выглядае, чым у праваслаўных. Суворых наказаў у нас няма. Самы важны пост – гэта Вялікая пятніца. Вернік абавязаны ўстрымацца ад мясных страў. Акрамя таго, у пятніцу можна спажываць ежу тры разы, але толькі адзін раз есці напоўніцу. Гэта датычыцца асоб ад 14 год да 60 гадоў. Людзям старэйшага веку пост не абавязковы. Граху ў тым, калі яны не гавеюць, няма.
– Што варта або не варта рабіць у Нядзелю?
– У католікаў гэтак прынята, што ўся сям’я намагаецца ўстаць зраніцы і падзяліцца асвенчаным у Вялікую суботу яйцом. За адным сталом, звычайна, збіраюцца ўсе родныя і сваякі. Гэта, так званы, Вялікодны сняданак.
– Што, на вашу думку, павінна быць на стале?
– Павінна быць усе на стале! Хрыстос уваскрос! Мы радуемся гэтаму!
– Наколькі рана трэба ўзняцца, каб патрапіць на сняданак?
– У розных парафіях – свае парадкі. Здараецца, што набажэнства пачынаецца а сёмай раніцы. Тады, канешне, варта ісці спачатку ў касцел, а потым, пасля вяртання дадому, вернікі ўжо сядаюць за стол. Але, падкрэслю, гэтакі парадак усталяваны не ва ўсіх касцёлах. Не трэба таксама забывацца пра малітву. Яна – паветра для нашай душы!
– Што варта рабіць цягам Вялікоднага дня?
– Вернікі або ходзяць адзін да аднаго ў госці або прымаюць гасцей. Гэтакі звычай!
– Ці прынята ў католікаў выпякаць вялікодныя булкі?
– Выпяканне булак – гэта ўсе ж усходняя традыцыя. Робяць гэта па ўсей Беларусі. Не бачу ў гэтым нічога заганнага. Каталіцтва – гэта ўвесь свет. У кожным рэгіёне свае звычаі, і гэта нармальна.
– Што асвяцаюць католікі, і калі?
– Асвяцаецца ўсё ў Святую суботу. У нас няма паняцця «булкі». Есць паняцце «хлеб». Асвячаецца таксама мяса, вяндліна, каўбасы, зразумела, у першую чаргу, размалеваныя яйкі і соль. Вось тое, што павінна быць у кошыку на асвячэнне.
– Што б вы пажадалі магілёўскім каталікам напярэдадні гэтакага Вялікага свята?
– Радасці! Бо Іісус уваскрэсе!
